Fasnacht 2026

Sujet und Zeedel 2026

Sy sin unter uns …

Neozoe und Neophyte
Fremdi Fözzel hän mir hütte,
Wo nit ins Oekosystem passe
Mit däne Yydringling isch nit z spasse!
Sy kömme klammheimlig, still und lyys
Im Cargo, im Flugi … tonnewyys!
Wöschbär, Gundel und Tigermugge
In Schachtle, Kontainer, uf Tourischterugge!
D Passkontrolle für Mensche sin hart …
Während dr Wöschbär gmietlig über d Gränze fahrt.
Biometrisch genau wirsch kontrolliert …
Während dr Japankäfer eifach yy marschiert.
Dys Passfötteli, ganz klar, dörf nit liege …
Während d Asia-Hornisse eifach yy ka fliege!
Die Vespa velutina nigrithorax,
Isch e tödligi Gfoor für d Bienli … kei Klax!
Die Hornisse het do unghinderet Macht,
Frisst Bienli zum Zmorge, zum Zmittag, zum Znacht.
Honig, Gmies, Frücht verschwinde vom Tisch
Wenn s letschti Bienli gfrässe isch.
Die Hornisse verbreitet sich rasend, drei Gselle
Vo däne hän sogar in unseri Clique welle!
S Desaschter kunnt glasklar uf ys zue,
D Vespa velutina git erscht denn Rueh,
Wenn au s letscht Clique- Bienli gfrässe isch
Denn sitzt sy am Katerzmorge-Tisch …
Muusbeiellei … gruusligi Stilli, s tuet weh …
… und kein leert meh über e Tisch sy Tee.
Doch ärnschthaft isch s Oekosystem am wangge
Wäm hän mir das Schlammassel z verdangge?
Dr menschlige Gyyr noch immer meh!
Sy duet dr Natur zuenähmend weh.
Statt grösser, mehr und alles toppe
Sotte mir s Machtunglychgwicht stoppe.
Dr Stärgger het d Macht, hesch s kapiert?
Ka frässe, ganz egal was passiert …
… au wenn derby s System kollabiert …
… au wenn derby d Natur krepiert …
… ungeniert …!
Isch jo schnurz!
Dänggt mänge kurz …
Grfässe wird hütt jo uf alle Syte
Lueg gnau ane, kasch s nit bestrytte.
Dr Klimawandel frisst dr Schnee,
D Alpe d Dörfer und no viel meh!
Dr Putin, dä Kaib, frisst d Ukraine,
Dr Trump sys eigene Volgg, s isch zum gryyne!
Manor Delikatesse wird gfrässe vom Coop,
Dr Bebbi quittiert das nit mit Lob.
Die Rächte frässe die Lingge,
ich statt Brot bald myni Fingge,
Denn d Krankekasse-Prämie frisst my Lohn
losst Spinnwääbe im Portemonnaie, sone Hohn!
Nit nur d Bienli hän e schwäre Stand
Und sin nümm sicher im eigene Land.
Sy sin unter uns … i fühl mi bedroht
Und suech emol bi dr KI Root.
D KI wird noch 3 Däg dängge
Dr Wält die passend Lösig schängge!
Dr Glaube dra isch doch nit dumm …
Also ab an d Fasnacht … summ summ summ …