Zeedel 2024:
Dr Keenig bin yych!
Daas isch mys Ryych!
Yych mach, was yych will!
Halt du d Klappe! Syg still!
Kompromiss? Uf gar kei Fall!
Zämmeschaffe? Hesch du e Knall?
Yych, yych bi-n e Egoischt!
Biz einsam zwar...sone Mischt...
Yych, yych bi au e Narzischt!
Hytte nennt me das Individualischt!
Schwarmverhalte isch veraltet
nur wär sys eige Ryych verwaltet
ka immer noo syner Nase goo
muess nie sy Wohl-Fyhl-Beryych verloo.
Unseri Gsellschaft duet sich wandle.
Mir dien befähle, nymm verhandle
denn jede kocht sys eige Syppli
me schafft nymm zämme imne Gryppli.
Au in unsere Klassezimmer
Wird’s dorum täglig schlimmer,
hesch statt Schieler ... delikati Majeschtäte
mit tuusig Äxtrawurscht-Raritäte!
Hesch nyt in dr Pfanne, nyt uf dr Platte,
Bisch strohdumm, in dr Biire nur Watte,
Gisch mit Glitzer und Klimbim,
mit Brands und Klamotte dym Läbe e Sinn,
denn bisch DU zem Keenig geboore...
au ohni british-abstehendi Ohre!
Dr Keenig quält mit egoistischer Macht
alli rundumme bis keine meh lacht.
Nadierlig derfsch dr Keenig nie kritisiere
är kennt suscht sys goldige Kreenli verliere!
Au sin’s keini Frynd, wo e Keenig umgänn,
sondern Schmeichler, Hyychler, wo profitiere wänn!
Denn alli, wo hinter em Keenig här flattere
Sin gyyrig, e biz billige Ruhm z ergattere.
Jede weiss: Hyychlertum und Hypokrisie
sin gebore in dr Monarchie!
Mir Wirfel sin bi däm Trend derby:
Jede will disjoor sy eigene Keenig sy!
Bi de Durchlauchte, Eedle vo blauem Bluet
gsehsch dr Hoochmuet bsunders guet,
Die Rubinroote strahle in samtigem Glanz,
Sälbschtverliebt, narzisstisch... voll und ganz!
Grien funggle d Smaragde do zmitz drin
wo an Egoismus nit z yberbiete sin!
S’schwarze Schoof isch zwar doof,
Doch so öppis bruucht’s an jedem Hoof!
Vorne linggs in erhabenem Schritt,
Pfyfft bi uns e ächti Maja-Stät mit!
Die Fasnacht wänn mir Keenige syy
und gniesse s’Chaos, wo entstoot derby!
Kein git nooch bim zämme Stritte
Jede laatscht uf e anderi Syte.
Ein foot rächts a, ein linggs mit em Schritt,
Yych pfyff Arabi... nei, dä will i nit!
Nur myni goldigi Fanfare
Ka uns vor em royale Untergang bewahre...!
Doch.... mach dir keini Sorge,
sobald mir am Donnschtig Morge
s’ goldig Kreenli vom eedle Haupt abe nämme
Simmer wieder die Zämmegwirflete und ghere zämme!!
Narzissmus heile kasch nur mit ere Pille
us Eerligkeit, Muet und starggem Wille!